مصطفیٰ جانِ رحمت پہ لاکھوں سلام شمعِ بزمِ ہدایت پہ لاکھوں سلام
مصطفیٰ جانِ رحمت پہ لاکھوں سلام شمعِ بزمِ ہدایت پہ لاکھوں سلام
مہرِ چرخِ نبوت پہ روشن درود گلِ باغِ رسالت پہ لاکھوں سلام
شہر یارِ ارم تاجدارِ حرم نو بہارِ شفاعت پہ لاکھوں سلام
شبِ اسریٰ کے دولہا پہ دائم درود نوشہِ بزمِ جنت پہ لاکھوں سلام
عرش کی زیب و زینت پہ عرشی درود فرش کی طیب و نزہت پہ لاکھوں سلام
نورِ عینِ لطافت پہ الطف درود جیب و زینِ نظافت پہ لاکھوں سلام
سروِ نازِ قدم مغزِ رازِ حکم یکہ تازِ فضیلت پہ لاکھوں سلام
نکتہِ سرِ وحدت پہ یکتا درود مرکزِ دورِ کثرت پہ لاکھوں سلام
صاحبِ رجعتِ شمس و شق القمر نائبِ دستِ قدرت پہ لاکھوں سلام
جس کے زیرِ لواء آدم و من سوا اس سزائے سیادت پہ لاکھوں سلام
عرش یا فرش ہے جس کے زیرِ نگیں اس کی قاہر ریاست پہ لاکھوں سلام
اصلِ ہر بود و بہبود تخمِ وجود قاسمِ کنزِ نعمت پہ لاکھوں سلام
فتحِ بابِ نبوت پہ بے حد درود ختمِ دورِ رسالت پہ لاکھوں سلام
شرقِ انوارِ قدرت پہ نوری درود فتحِ اظہارِ قربت پہ لاکھوں سلام
بے سہیم و قسیم و عدیل و مثیل جوہرِ فردِ عزت پہ لاکھوں سلام
سرِ غیبِ ہدایت پہ غیبی درود عطرِ جیبِ نہایت پہ لاکھوں سلام
ماہِ لاہوتِ خلوت پہ لاکھوں درود شاہِ ناسوتِ جلوت پہ لاکھوں سلام
کنزِ ہر بیکس و بے نوا پر درود حرزِ ہر رفتہ طاقت پہ لاکھوں سلام
پرتوِ اسمِ ذاتِ احد پر درود نسخہِ جامعیت پہ لاکھوں سلام
مطلعِ ہر سعادت پہ اسعد درود مقطعِ ہر سیادت پہ لاکھوں سلام
خلق کے داد رس سب کے فریاد رس کہفِ روزِ مصیبت پہ لاکھوں سلام
مجھ سے بیکس کی دولت پہ لاکھوں درود مجھ سے بے بس کی قوت پہ لاکھوں سلام
شمعِ بزمِ دنا ہوں میں گم کن انا شرحِ متنِ ہویت پہ لاکھوں سلام
انتہائے دعائے ابتدائے یقیں جمعِ تفریق و کثرت پہ لاکھوں سلام
کثرتِ بعدِ قلت پہ اکثر درود عزتِ بعدِ ذلت پہ لاکھوں سلام
ربِ اعلیٰ کی نعمت پہ اعلیٰ درود حق تعالیٰ کی منت پہ لاکھوں سلام
ہم غریبوں کے آقا پہ بے حد درود ہم فقیروں کی ثروت پہ لاکھوں سلام
فرحتِ جانِ مومن پہ بے حد درود غیظِ قلبِ جلالت پہ لاکھوں سلام
سببِ ہر سبب منتہائے طلب علتِ جملہ علت پہ لاکھوں سلام
مصدرِ مظہریت پہ اظہر درود مظہرِ مصدریت پہ لاکھوں سلام
جس کے جلوے سے مرجھائی کلیاں کھلیں اس گلِ پاک منبت پہ لاکھوں سلام
قدِ بے سایہ کے سایہِ مرحمت ظلِ ممدودِ رافت پہ لاکھوں سلام
طائرانِ قدس جس کی ہیں قمریاں اس سہی سرو قامت پہ لاکھوں سلام
وصف جس کا ہے آئینہِ حق نما اس خدا ساز طلعت پہ لاکھوں سلام
جس کے آگے سرِ سروراں خم رہے اس سرِ تاجِ رفعت پہ لاکھوں سلام
وہ کرم کی گھٹا گیسوئے مشک سا لکہِ ابرِ رافت پہ لاکھوں سلام
لیلتہ القدر میں مطلع الفجرِ حق مانگ کی استقامت پہ لاکھوں سلام
لخت لختِ دلِ ہر جگر چاک سے شانہ کرنے کی حالت پہ لاکھوں سلام
دور و نزدیک کے سننے والے وہ کان کانِ لعلِ کرامت پہ لاکھوں سلام
چشمہِ مہر میں موجِ نورِ جلال اس رگِ ہاشمیت پہ لاکھوں سلام
جس کے ماتھے شفاعت کا سہرا رہا اس جبینِ سعادت پہ لاکھوں سلام
جن کے سجدے کو محرابِ کعبہ جھکی ان بھووں کی لطافت پہ لاکھوں سلام
ان کی آنکھوں پہ وہ سایہ افگن مژہ ظلِ قصرِ رحمت پہ لاکھوں سلام
اشک باریِ مژگاں پہ برسے درود سلکِ درِ شفاعت پہ لاکھوں سلام
معنیِ قد رآی مقصدِ ما طغیٰ نرگسِ باغِ قدرت پہ لاکھوں سلام
جس طرف اٹھ گئی دم میں دم آ گیا اس نگاہِ عنایت پہ لاکھوں سلام
نیچی آنکھوں کی شرم و حیا پر درود اونچی بینی کی رفعت پہ لاکھوں سلام
جن کے آگے چراغِ قمر جھلملائے ان عذاروں کی طلعت پہ لاکھوں سلام
ان کے خد کی سہولت پہ بے حد درود ان کے قد کی رشافت پہ لاکھوں سلام
جس سے تاریک دل جگمگانے لگیں اس چمک والی رنگت پہ لاکھوں سلام
چاند سے منہ پہ تاباں درخشاں درود نمک آگیں صباحت پہ لاکھوں سلام
شبنمِ باغِ حق یعنی رخ کا عرق اس کی سچی برکات پہ لاکھوں سلام
خط کی گردِ دہن وہ دلارا فبن سبزہِ نہرِ رحمت پہ لاکھوں سلام
ریشِ خوش معتدل مرہمِ ریشِ دل ہالہِ ماہِ ندرت پہ لاکھوں سلام
پتلی پتلی گلِ قدس کی پتیاں ان لبوں کی نزاکت پہ لاکھوں سلام
وہ دہن جس کی ہر بات وحیِ خدا چشمہِ علم و حکمت پہ لاکھوں سلام
جس کے پانی سے شاداب جان و جناں اس دہن کی طراوت پہ لاکھوں سلام
جس سے کھاری کنویں شیر و شکر بنے اس زلالِ حلاوت پہ لاکھوں سلام
وہ زباں جس کو سب 'کن' کی کنجی کہیں اس کی نافذ حکومت پہ لاکھوں سلام
اس کی پیاری فصاحت پہ بے حد درود سیدِ دلکش بلاغت پہ لاکھوں سلام
اس کی باتوں کی لذت پہ لاکھوں درود اس کے خطبے کی ہیبت پہ لاکھوں سلام
وہ دعا جس کا جوبن بہارِ قبول اس نسیمِ اجابت پہ لاکھوں سلام
جن کے گچھے سے لچھے جھڑے نور کے ان ستاروں کی نزہت پہ لاکھوں سلام
جس کی تسکیں سے روتے ہوئے ہنس پڑے اس تبسم کی عادت پہ لاکھوں سلام
جس میں نہریں ہیں شیر و شکر کی رواں اس گلے کی نظارت پہ لاکھوں سلام
دوش بر دوش ہے جن کے شانِ شرف ایسے شانوں کی شوکت پہ لاکھوں سلام
حجرِ اسودِ کعبہِ جان و دل یعنی مہرِ نبوت پہ لاکھوں سلام
روئے آئینہِ علمِ پشتِ حضور پشتیِ قصرِ ملت پہ لاکھوں سلام
ہاتھ جس سمت اٹھا غنی کر دیا موجِ بحرِ سماحت پہ لاکھوں سلام
جس کو بارِ دو عالم کی پروا نہیں ایسے بازو کی قوت پہ لاکھوں سلام
کعبہِ دین و ایماں کے دونوں ستوں سیدینِ رسالت پہ لاکھوں سلام
جس کے ہر خط میں ہے موجِ نورِ کرم اس کفِ بحرِ ہمت پہ لاکھوں سلام
نور کے چشمے لہرائے دریا بہے انگلیوں کی کرامت پہ لاکھوں سلام
عیدِ مشکل کشائی کے چمکے ہلال ناخنوں کی بشارت پہ لاکھوں سلام
رفعِ ذکرِ جلالت پہ ارفع درود شرحِ صدرِ صدارت پہ لاکھوں سلام
دل سمجھ سے وراء ہے مگر یوں کہوں غنچہِ رازِ وحدت پہ لاکھوں سلام
کل جہاں ملک اور جو کی روٹی غذا اس شکم کی قناعت پہ لاکھوں سلام
جو کہ عزمِ شفاعت پہ کھنچ کر بندھی اس کمر کی حمایت پہ لاکھوں سلام
انبیاء تہ کریں زانو ان کے حضور زانووں کی وجاہت پہ لاکھوں سلام
ساقِ اصلِ قدم شاخِ نخلِ کرم شمعِ راہِ اصابت پہ لاکھوں سلام
کھائی قرآن نے خاکِ گزر کی قسم اس کفِ پا کی حرمت پہ لاکھوں سلام
جس سہانی گھڑی چمکا طیبہ کا چاند اس دل افروز ساعت پہ لاکھوں سلام
پہلے سجدے پہ روزِ ازل سے درود یادگاریِ امت پہ لاکھوں سلام
ذرِ شادابِ ہر ذرِ پر شیر سے برکاتِ رضاعت پہ لاکھوں سلام
بھائیوں کے لیے ترکِ پستان کریں دودھ پیتوں کی نصفعت پہ لاکھوں سلام
مہدِ والا کی قسمت پہ بے حد درود برجِ ماہِ رسالت پہ لاکھوں سلام
اللہ اللہ وہ بچپنے کی پھبن اس خدا بھاتی صورت پہ لاکھوں سلام
اٹھتے بوٹوں کی نشو و نما پر درود کھلتے غنچوں کی نکہت پہ لاکھوں سلام
فضلِ پیدائشی پر ہمیشہ درود کھیلنے سے کراہت پہ لاکھوں سلام
اعتلائے جبلت پہ اعلیٰ درود اعتدالِ طویت پہ لاکھوں سلام
بے بناوٹ ادا پر ہزاروں درود بے تکلف ملاحت پہ لاکھوں سلام
بھینی بھینی مہک پر مہکتی درود پیاری پیاری نفاست پہ لاکھوں سلام
میٹھی میٹھی عبارت پہ شیریں درود اچھی اچھی اشارت پہ لاکھوں سلام
سیدھی سیدھی روش پر کروڑوں درود سادہ سادہ طبیعت پہ لاکھوں سلام
روزِ گرم و شبِ تیرہ و تار میں کوہ و صحرا کی خلوت پہ لاکھوں سلام
جس کے گھیرے میں ہیں انبیاء و ملک اس جہانگیرِ بعثت پہ لاکھوں سلام
اندھے شیشے جھلاجھل دمکنے لگے جلوہ ریزیِ دعوت پہ لاکھوں سلام
لطفِ بیداریِ شب پہ بے حد درود عالمِ خوابِ راحت پہ لاکھوں سلام
خندہِ صبحِ عشرت پہ نوری درود گریہِ ابرِ رحمت پہ لاکھوں سلام
نرمیِ خوئے لینت پہ دائم درود گرمیِ شانِ سطوت پہ لاکھوں سلام
جس کے آگے کھنچی گردنیں جھک گئیں اس خدا داد شوکت پہ لاکھوں سلام
کس کو دیکھا یہ موسیٰ سے پوچھے کوئی آنکھ والوں کی ہمت پہ لاکھوں سلام
گردِ ماہ دستِ انجم میں رخشاں ہلال بدر کی دفعِ ظلمت پہ لاکھوں سلام
شورِ تکبیر سے تھرتھراتی زمیں جنبشِ جوشِ نصرت پہ لاکھوں سلام
نعرہ ہائے دلیراں سے بن گونجتے گرشِ کوسِ جرات پہ لاکھوں سلام
وہ چکا چاک خنجر سے آتی صدا مصطفیٰ تیری صولت پہ لاکھوں سلام
ان کے آگے وہ حمزہ کی جاں بازیاں شیرِ غرانِ سطوت پہ لاکھوں سلام
الغرض ان کے ہر مو پہ لاکھوں درود ان کی ہر خو و خصلت پہ لاکھوں سلام
ان کے ہر نام و نسبت پہ نامی درود ان کے ہر وقت و حالات پہ لاکھوں سلام
ان کے مولیٰ کی ان پر کروڑوں درود ان کے اصحاب و عترت پہ لاکھوں سلام
پارہ ہائے صحف غنچہِ قدس اہلِ بیتِ نبوت پہ لاکھوں سلام
آبِ تطہیر سے جس میں پودے جمے اس ریاضِ نجابت پہ لاکھوں سلام
خونِ خیر الرسل سے ہے جن کا خمیر ان کی بے لوث طینت پہ لاکھوں سلام
اس بتولِ جگر پارہِ مصطفیٰ حجلہ آراءِ عفت پہ لاکھوں سلام
جس کا آنچل نہ دیکھا مہ و مہر نے اس ردائے نزاہت پہ لاکھوں سلام
سیدہ زاہرہ طیبہ طاہرہ جانِ احمد کی راحت پہ لاکھوں سلام
حسنِ مجتبیٰ سید الا سخیاء راکبِ دوشِ عزت پہ لاکھوں سلام
اوجِ مہرِ ہدیٰ موجِ بحرِ ندا روحِ روحِ سخاوت پہ لاکھوں سلام
شہد خوارِ لعابِ زبانِ نبی چاشنی گیرِ عصمت پہ لاکھوں سلام
اس شہیدِ بلا شاہِ گلگوں قبا بیکسِ دشتِ غربت پہ لاکھوں سلام
درِ درجِ نجف مہرِ برجِ شرف رنگِ روئے شہادت پہ لاکھوں سلام
اہلِ اسلام کی مادرانِ شفیق بانوانِ طہارت پہ لاکھوں سلام
جلوہ گیانِ بیت الشرف پر درود پردہ گیانِ عفت پہ لاکھوں سلام
سیما پہلی ماں کہفِ امن و اماں حق گزارِ رفاقت پہ لاکھوں سلام
عرش سے جس پہ تسلیم نازل ہوئی اس سرائے سلامت پہ لاکھوں سلام
منزل من قصب لا نصب لا صخب ایسے کوشک کی زینت پہ لاکھوں سلام
بنتِ صدیق آرامِ جانِ نبی اس حریمِ براءت پہ لاکھوں سلام
یعنی ہے سورہِ نور جن کی گواہ ان کی پر نور صورت پہ لاکھوں سلام
جن میں روح القدس بے اجازت نہ جائے ان سرادق کی عصمت پہ لاکھوں سلام
شمعِ تابانِ کاشانہِ اجتہاد مفتیِ چار ملت پہ لاکھوں سلام
جاں نثارانِ بدر و احد پر درود حق گزارانِ بیعت پہ لاکھوں سلام
وہ دسو جن کو جنت کا مژدہ ملا اس مبارک جماعت پہ لاکھوں سلام
خاص اس سابقِ سیرِ قربِ خدا اوحدِ کاملیت پہ لاکھوں سلام
سعیِ مصطفیٰ مئیِ اصطفیٰ عز و نازِ خلافت پہ لاکھوں سلام
اصدق الصادقیں سید المتقین چشم و گوشِ وزارت پہ لاکھوں سلام
وہ عمر جس کے اعداء پہ شیدا سقر اس خدا دوست حضرت پہ لاکھوں سلام
فاروقِ حق و باطل امام الہدیٰ تیغِ مسلولِ شدت پہ لاکھوں سلام
ترجمانِ نبی ہم زبانِ نبی جانِ شانِ عدالت پہ لاکھوں سلام
زاہدِ مسجدِ احمدی پر درود دولتِ جیشِ عسرت پہ لاکھوں سلام
درِ منصور قرآن کی سلکِ بہی زوجِ دو نورِ عفت پہ لاکھوں سلام
یعنی عثمان صاحب قمیصِ ہدیٰ حلہ پوشِ شہادت پہ لاکھوں سلام
مرتضیٰ شیرِ حق اشجع الاشجعیں ساقیِ شیر و شربت پہ لاکھوں سلام
اصلِ نسلِ صفا وجہِ وصلِ خدا بابِ فصلِ ولایت پہ لاکھوں سلام
اولیں دفعِ اہلِ رفض و خروج چارمی رکنِ ملت پہ لاکھوں سلام
شیرِ شمشیر زن شاہِ خیبر شکن پرتوِ دستِ قدرت پہ لاکھوں سلام
ماہیِ رفض و تفضیل و نصب و خروج حامیِ دین و سنت پہ لاکھوں سلام
مومنین پیشِ فتح و پسِ فتح سب اہلِ خیر و عدالت پہ لاکھوں سلام
جس مسلمان نے دیکھا انہیں اک نظر اس نظر کی بصارت پہ لاکھوں سلام
جن کے دشمن پہ لعنت ہے اللہ کی ان سب اہلِ محبت پہ لاکھوں سلام
باقیِ ساقیانِ شرابِ طہور زینِ اہلِ عبادت پہ لاکھوں سلام
اور جتنے ہیں شہزادے اس شاہ کے ان سب اہلِ مکانات پہ لاکھوں سلام
ان کی بالا شرافت پہ اعلیٰ درود ان کی والا سیادت پہ لاکھوں سلام
شافعی مالکی احمد امامِ حنیف چار باغِ امامت پہ لاکھوں سلام
کاملانِ طریقت پہ کامل درود حاملانِ شریعت پہ لاکھوں سلام
غوثِ اعظم امام المتیٰ والنقیٰ جلوہِ شانِ قدرت پہ لاکھوں سلام
قطبِ ابدال و ارشاد و رشد و الرشاد محیِ دین و ملت پہ لاکھوں سلام
مردِ خیلِ طریقت پہ بے حد درود فردِ اہلِ حقیقت پہ لاکھوں سلام
جس کی منبر بنی گردنِ اولیاء اس قدم کی کرامت پہ لاکھوں سلام
شاہِ برکات و برکاتِ پیشینیاں نو بہارِ طریقت پہ لاکھوں سلام
سید آلِ محمد امام الرشید گلِ روضِ ریاضت پہ لاکھوں سلام
حضرتِ حمزہ شیرِ خدا و رسول زینتِ قادریت پہ لاکھوں سلام
نام و کام و تن و جان و حال و مقال سب میں اچھے کی صورت پہ لاکھوں سلام
نورِ جاں عطرِ مجموعہ آلِ رسول میرے آقاِ نعمت پہ لاکھوں سلام
زیبِ سجادہ سجادہِ نوری نہاد احمدِ نور طینت پہ لاکھوں سلام
بے عذاب و عتاب و حساب و کتاب تا ابد اہلِ سنت پہ لاکھوں سلام
تیرے ان دوستوں کے طفیل اے خدا بندہِ ننگِ خلقت پہ لاکھوں سلام
میرے استاد ماں باپ بھائی بہن اہلِ ولد و عشیرت پہ لاکھوں سلام
اک میرا ہی رحمت میں دعویٰ نہیں شاہ کی ساری امت پہ لاکھوں سلام
کاش محشر میں جب ان کی آمد ہو اور بھیجیں سب ان کی شوکت پہ لاکھوں سلام
مجھ سے خدمت کے قدسی کہیں ہاں رضا مصطفیٰ جانِ رحمت پہ لاکھوں سلام
हमें आपकी सहायता की आवश्यकता है। हमारी हौसला अफजाई करने के लिए। पोस्ट को लाइक, कमेंट और शेयर करें। धन्यवाद।
👍💬♻️👍💬♻️👍💬♻️👍💬♻️👍💬♻️👍💬♻️👍💬♻️👍💬♻️👍💬♻️👍💬♻️
ہمیں آپ کی مدد کی ضرورت ہے۔ ہماری حوصلہ افزائی کرنا۔ پوسٹ کو لائک ، کمنٹ اور شئیر کریں۔ ہمیں آپ کی مدد کی ضرورت ہے۔ ہماری حوصلہ افزائی کرنا۔ پوسٹ کو لائک ، کمنٹ اور شئیر کریں۔ شکریہ
👍💬♻️👍💬♻️👍💬♻️👍💬♻️👍💬♻️👍💬♻️👍💬♻️👍💬♻️👍💬♻️👍💬♻️
We need your help. To encourage us. Like, comment and share the post. Thank you.
👍💬♻️👍💬♻️👍💬♻️👍💬♻️👍💬♻️👍💬♻️👍💬♻️👍💬♻️👍💬♻️👍💬♻️
कोई टिप्पणी नहीं
एक टिप्पणी भेजें